Nə istədim bu dünyadan görəsən?
Tut əlimdən
bir az yumum gözümü,
Yuxu
nədir öyrənməyim əcəldən.
Tut əlimdən
möhkəm-möhkəm yapışım
Kömək
umub uzadılan hər əldən.
Tut əlimdən
sirrlərimə agah ol,
Qurtar
yazıq cümlələri, mübtədasız xəbərdən.
Tut əlimdən,
elə tut ki, buraxma,
İstisiyçün
dilənməyim yad əldən.
Tut əlimdən
fələk üzün çevirsin,
Gözlərimin
yaşı axsın belimdən.
Tut əlimdən
buraxma ki, qaçmayım,
“Mən”lərimdən
ayrı düşdüm əzəldən.
Tut əlimdən
zaman özün devirsin,
Qucaqlayım
keçmişimi, gələcəyim gəlmədən.
No comments:
Post a Comment