Kimi yol saxlamır qayıdım geri,
Yığaram ovcuma qərib kədəri,
Qoy mən gedən olum, salamat qalın!
Kimiyçün indiyəm, kimiyçün sonra,
Kimisi yol verir, kimisi yola,
Mən dönsəm dönərəm sağa, ya sola,
Qoy mən dönən olum, günahsız qalın!
Kiminin ömründə kəpənək kimi
Kiminin ömründə bir ləçək kimi,
Ya az yaşadıldım, ya az yaşadım,
Mən qoca gedirəm, siz cavan qalın!
Kiminin ağına rənglər qatmışam,
Kiminin qarasın ağ boyamışam,
Desələr bir kəsə böhtan atmışam,
Dostlar! İnansanız, salamat qalın!
Kiminin əlindən tutduğum kimi,
Kiminin əlini umduğum kimi,
Gələni keçmişlə qovduğum kimi,
Mən torpaq oluram, siz uzaq qalın!
Kimini çəkmişəm həsrətlə dara,
Kimiylə çıxmışam bir uzun yola,
İstədim sənsizlik bir yuxu ola,
Gör nələr deyirəm, siz oyaq qalın!
Kimi doğma üçün qəribəm, qərib,
Kimi yad ürəkdi, qəflətən gəlib
Qəhqəhə çəkərək ömrümə girib,
Gözümdən yaş çəkib mənalar alın!
Kimisi daxilən təmizdi güya,
Kimisin gizlədir üzdəki boya,
Yalnızlıq bənzədi səssiz kinoya,
Mən səssiz baxıram, siz səs-küy salın!
No comments:
Post a Comment